1 Keunenks 16
01Doarom luit de HEER dou deur Jehu, zeun van Chanani, oet zien noam tegen Basa zeggen:
02"Ik heb die tou t stof oethoald en aansteld as vorst over mien volk Israël. Mor doe bist t pad opgoan van Jerobeam en hest Isrelieten, mien volk, der tou aanzet om zunde te bedrieven en mie mit heur zunden te taargen.
03Doarom zel ik Basa en zien hoes votvegen, net as t hoes van Jerobeam, zeun van Nebat.
04Wèl van femilie van Basa in stad staarft, zel deur honden opvreten worden en dij in t open veld staarft, zel deur vogels opvreten worden."
05Aander biezunderheden over Basa en zien overwinnens binnen optaikend in kronieken van keunenks van Israël.
06Basa ging rusten bie zien veurgeslacht. Hai wer begroaven in Tirsa. Zien zeun Ela volgde hom op.
07Zo het de HEER zok deur tussenkomst van Jehu, zeun van Chanani, richt tegen Basa en zien hoes, omdat hai doan het wat verkeerd is in ogen van de HEER. Hai haar ja, net as Jerobeam en zien hoes, de HEER taargd deur aal wat hai doan het. Doar komt nog bie dat hai t hoes van Jerobeam oetmoord het.
08In t zesentwinnegste joar van keunenk Asa van Juda wer Ela, zeun van Basa, keunenk van Israël, in Tirsa. Hai regaaierde twij joar.
09Zimri, dij hom dainde en bevelhebber was over haalfschaid van woagenmenners, zette n aanslag tegen hom op taauw. Dou Ela zok doen dronk in t hoes van zien hofmeester Arsa in Tirsa,
10 kwam Zimri der over tou en sluig hom dood. t Was in t zeuventwinnegste joar van regaaiern van keunenk Asa van Juda dat Zimri Ela doodsloagen het en keunenk wer in zien stee.
11 Dou hai macht ainmoal in handen haar en goud en wel op troon zat, luit hai t haile keunenkshoes van Basa om haals brengen. Der bleef gainain van t mannelk geslacht in leven, gain femilielid of vrund bleef over om hom te vreken.
12 Zo het Zimri t haile hoes van Basa oetreud, zo as de HEER dat deur profeet Jehu al over Basa zeggen loaten haar,
13 omdat Basa en zien zeun Ela zundegd haren mit Isrelieten tot zunde aan te zetten deur de HEER, God van Israël, mit heur ofgoden te taargen.
14 Wat boetendes over Ela te verhoalen vaalt, is opschreven in kronieken van keunenks van Israël.
15 In t zeuventwinnegste joar van keunenk Asa van Juda, wer Zimri keunenk in Tirsa. Dat was hai zeuven doagen. t Leger lag veur Filistijnse stad Gibbeton.
16 Dou t volk doar heurde dat Zimri n aanslag op taauw zet haar tegen keunenk en hom doodhaauwen haar, hebben zai op aigenste dag in t legerkaamp heur aanvoerder Omri oetroupen as keunenk over Israël.
17 Omri trok mit t haile leger oet Gibbeton op tegen keunenk Zimri en belegerde Tirsa.
18 Dou Zimri zag dat stad innomen worden zol, trok hai zok terog in t verstaarkte gedailte van t pelaais van keunenk en stook t in brand. Zo kwam hai om t leven,
19 omdat hai zundegd haar en dee wat slecht is in ogen van de HEER. Hai haar ja t veurbeeld van Jerobeam volgd en net as hai Israël aanzet om te zundegen.
20 Wat boetendes over Zimri te verhoalen vaalt en over aanslag dij hai op taauw zette, is optaikend in kronieken van keunenks van Israël.
21 Noa dood van Zimri is t leger van Israël in twijen oet nkander valen. t Aine kaamp wol Tibni, zeun van Ginat, as keunenk oetroupen en t aander kaamp wol Omri hebben.
22 Aanhangers van Omri wazzen staarker as dij van Tibni. Tibni, zeun van Ginat, sturf en dou wer Omri keunenk.
23 Omri wer keunenk over Israël in t ainendattegste joar van regaaiern van keunenk Asa van Juda. Hai regaaierde twaalf joar. Dou hai zès joar in Tirsa regaaierd haar,
24 kocht hai n baarg van n zekere Semer veur twij talent zulver. Hai luit ter hoezen op baauwen en nuimde stad dij hai baauwen luit Samaria, noar Semer, veurege aigender van baarg.
25 Omri dee wat verkeerd is in ogen van de HEER, hai muik t nog veul slimmer as aal zien veurgangers.
26 Hai dee t zulfde as Jerobeam, zeun van Nebat, dij Israël aanzet haar om te zundegen tegen de HEER, God van Israël. Zai taargden hom mit heur ofgoden van niks.
27 Wat ter meer over Omri te verhoalen vaalt en zien overwinnens dij hai behoald het, is optaikend in kronieken van keunenks van Israël.
28 Omri wer deellegd bie zien veurgeslacht, hai wer begroaven in Samaria. Zien zeun Achab wer keunenk veur hom in stee.
29 Achab, zeun van Omri, wer keunenk over Israël in t achtendattegste joar van Asa, keunenk van Juda. Twijentwinneg joar regaaierde hai in Samaria.
30 Achab dee wat verkeerd is in ogen van de HEER, meer as aalmoal dij veur hom west haren.
31 Dat hai dee wat Jerobeam, zeun van Nebat, doan haar, was t slimste nog nait. Veul slimmer was t dat hai traauwde mit Izebel, dochter van keunenk Etbaäl van Sidon en dat hai Baäl dainde en zok veur hom deelboog.
32 Hai luit in Samaria n tempel veur Baäl baauwen en zette doar n altoar veur Baäl in.
33 Hai muik ook n Asjerapoal. Mit zoks soort dingen taargde hai de HEER, meer as ale keunenks van Israël veur hom.
34 In tied van Achab wer Jericho weer opbaauwd deur Chiël oet Betel. Dou hai fonnementen legde, kostte hom dat zien oldste zeun Abiram en dou hai poortdeuren stelde, kostte hom dat Segub, zien jongste, zo as de HEER bie monde van Jozua, zeun van Nun, veurzegd haar.
|
